venres, 20 de abril de 2018

The Long and Winding Road

"Largo e sinuoso é o camiño" cantaban os Beatles... e quizais así sexa o percorrido que teñan que facer estas mochilas viaxeiras ata chegar ás casas dos nosos usuarios e usuarias, cargadiñas de libros e películas para toda a familia.
Os fogares encheranse de imaxinación e historias que contar.
 <<Cando era pequeno, miña nai sempre me dicía que a felicidade era a clave para a vida. Cando fun á escola, preguntáronme que quería ser de maior, escribín "feliz". Dixéronme que eu non entendía a pregunta. Eu contesteilles que non entendían a vida>>.
John Lennon

xoves, 19 de abril de 2018

Contos de boas noites

Aroa de 3º B e Xoel de 3º A de Primaria recoméndannos o volume I e II, respectivamente, do libro Cuentos de buenas noches: niñas rebeldes. Unha obra que narra a vida de mulleres valentes e loitadoras, que sobresaíron no pasado ou que o fan no presente nalgún ámbito.

Ata nos contan cal é a historia que máis lles gustou. Moi atentos!

 Que ben o contáchedes! Noraboa!

"Dígoche o que é a liberdade para min: non ter medo"
Nina Simone

mércores, 18 de abril de 2018

Recén chegados!

Incorporamos ao noso catálogo máis novidades. Os libros xa están na biblioteca, á vosa disposición. Atoparedes obras para todos os gustos.

Se che apaixonan as historias divertidas, Los peores niños del mundo é o libro que estás buscando, xa que conta as trasgadas de dez nenos e nenas nas que non deixarás de rir en ningún momento.

Por outra banda, queremos destacar Pequeñas cosas. Unha novela gráfica sen letras pero chea de luz. Un libro que trata os medos e ansiedades infantís.

Non podía faltar a ciencia nas novas incorporacións. Co libro Conceptos científicos en 30 segundos aprenderás a descubrir o mundo que te rodea.



Para os lectores expertos tamén temos sorpresas.
Por petición popular, incorporamos o best- séller Por trece razones.
Queremos sinalar , ademais, estoutras:
Tinta y fuego, unha novela imprescindible para os amantes do xénero fantástico.
Tú &Yo. Aquí, ahora, un libro que trata sobre as barreiras invisibles que hai entre a amizade e o amor, a importancia de vivir aquí e agora.
George, unha historia tenra e conmovedora. Un libro para aprender a aceptarnos como somos.





E se eres seguidor do superheroe procedente do planeta Krypton, esta é a túa sección. Goza coas aventuras de Superman!



" Se un libro está ben escrito, sempre me parece que é demasiado curto".
Jane Austen

martes, 17 de abril de 2018

Burbulla científica

Esta mañá, durante o recreo, varias axudantas da biblioteca de 5ºB transportaron ao alumnado de 2º de Primaria a unha burbulla científica.
Goya, Lucía, María, Dafne e Elisa realizaron dous experimentos sinxelos no Laboratorio Ángel Carracedo. 

Arco da vella con cacahuetes
Para o primeiro experimento só empregaron cacahuetes con chocolate de cores, auga e pratos brancos. 

 Colleron os pratos, botaron a auga e colocaron os doces nos seus bordes. Ao pouco tempo, os colorantes comezaron a disolverse e a expandirse polo líquido, creando unha composición moi vistosa.

Extracción de ferro dos cereais
O segundo experimento consistiu en ver a cantidade de ferro que teñen os cereais, unha comida que nos aporta unha boa fonte de enerxía cada día. Para iso, trituraron os cereais e despois achegáronlle un imán para extraer o ferro que contiñan.


"Son das que pensan que a ciencia ten unha gran beleza. Un científico no laboratorio é tamén un neno colocado cara fenómenos naturais que lle impresionan coma un conto de fadas"
Marie Curie

venres, 13 de abril de 2018

A biblioteca é encontro

Celia impartiu na biblioteca a cuarta sesión do obradoiro de manga. A este encontro, que ten lugar dous venres de cada mes, nunca fallan os seguidores máis fieis destas historietas xaponesas.


Esta mañá centráronse na ilustración de corpos e no deseño de roupa e complementos.

E aínda non foches ver as novidades do mes de abril?
 Bule, que escapan!


 "Eres o meu refuxio, a miña cova.  Eres un palacio de elegancia extrema. Eres cultura, coñecemento, sorpresa,inquedanza... Eres a miña biblioteca!
Isabel Barriel

mércores, 11 de abril de 2018

Cóntame un conto

A biblioteca volveu ser testigo de como voluntarias da biblioteca, de 5º e 6º de Primaria, lles contaban un conto aos seus compañeiros/as máis novos/as.
Alba, Claudia Dorna, Claudia Puertas e Jesica de 5º de Primaria, xunto con Ciara de 6º, léronlle e representaron o libro "Mamá va al cole" ao alumnado de 1º de Primaria. 
Un conto que relata o primeiro día de colexio duns nenos e nenas. Unha historia chea de tenrura con moitos momentos de diversión. 

Unha actividade moi importante tanto para os oíntes coma para as lectoras, xa que ambos grupos saen beneficiados. No caso dos primeiros: melloran a atención, comprensión, a súa capacidade de escoita activa... E as segundas, progresan na súa práctica e expresividade lectora.

E en definitiva, comparten momentos de lectura.

Moitas grazas!

"Un libro é un misterio no que se encontra algo que non se buscaba ou que non estaba ao alcance de ninguén"
Inese Zandere

martes, 10 de abril de 2018

Xornada de formación do uso da radio

Esta mañá membros do club de lectura de Secundaria, do grupo de teatro e do voluntariado da biblioteca tiveron unha xornada de formación no uso da radio, impartida por Rede Espora.

A primeira parte consistiu nunha sesión conxunta na biblioteca onde se aclararon conceptos radiofónicos, recibiron algún consello para o directo e practicaron a transmisión de mensaxes empregando a entoación axeitada.



A segunda parte foi máis técnica basada na aprendizaxe do uso da mesa: o control dos micros, o uso de música, a gravación e a postprodución básica. Para iso fixéronse tres quendas e abordáronse distintas estruturas:

Programa Bookcluber, a través do modelo de entrevista.
Os primeiros en participar no laboratorio da radio foron os compañeiros/as do club de lectura de Secundaria. Elaboraron un programa de entrevistas onde recomendaban libros.



Programa: Radio Teatro, a través do modelo de dramatización
Doce alumnos/as do grupo de teatro "A Mata" interpretaron dúas escenas da obra que representarán ao final do curso.

Programa: Potenciar a contorna. Modelo informativo
Partindo da alfabetización documental e das competencias ALFIN/ AMI o alumnado de 6º de Primaria, que son axudantes da biblioteca, elaboraron un programa publicitario e informativo de O Rosal.


Podedes ver o resumo da xornada no seguinte vídeo:

E recordamos que para escoitar os programas de A Voz da Mata, tedes que entrar na plataforma IVOOX , tamén accedendo directamente dende a web do cole. 


"A radio é  un medio sen medo xa que chega a todo o planeta a través da novas tecnoloxías"
Julia Otero