venres, 25 de maio de 2018

Derradeiro obradoiro de manga

A nosa experta ilustradora de estilo manga , Celia Areal, impartiu hoxe o seu derradeiro obradoiro de manga por este curso.
Sete xornadas nas que aprenderon, principalmente, técnicas básicas para debuxar personaxes manga. 

 Na primeiras sesións - recorda Celia- estiveron coñecendo as proporcións do debuxo e tipos de anime, e xa nas últimas clases centráronse nos aspectos máis específicas do estilo (transformar un personaxe en "chibi", por exemplo).



Unha actividade que non só serviu para avanzar na creación de historietas de orixe xaponés, senón que tamén propiciou a formación de vínculos entre os asistentes.



Desexamos que para o vindeiro curso, poidamos seguir aprendendo de ti, Celia. Moitas gracias!

 "Cando a información é compartida e se busca o mesmo obxectivo, flúen máis ideas e a creatividade é máis alta”.
Alba Caraballo

xoves, 24 de maio de 2018

As pegadas de ELLA

O proxecto da biblioteca sobre as mulleres, que vertebra todo o centro, está deixando o seu rastro no colexio grazas ao Departamento de Plástica e ás alumnas e alumnos de Secundaria.

Na porta da aula de Ciencias Socias I, Sabela Treinta encargouse de debuxar (xunto coa axudante, Henar Barbosa) á heroína galega, María Pita. Unha das mulleres máis importantes na historia de Galicia.
E na aula de informática de Primaria, Verónica Alonso encárgase de representar á primeira persoa programadora da historia, a matemática e escritora británica Ada Lovelance.
"Canto tempo deben esperar as mulleres para obter a súa liberdade? Déixennos ter os dereitos que merecemos."
Alice Paul

mércores, 23 de maio de 2018

Unha mañá na Voz da Mata

Hoxe tivemos na radio a Sandra, a Educadora Familiar do Concello de O Rosal, para falarnos do seu traballo e dos obradoiros e actividades que realiza no noso centro. 
A entrevista estivo a cargo do alumnado de Lingua Castelá de Agrupamento, de 1º da ESO.
Pasamos un bo rato e deunos moita información importante para a mocidade.
Ademais, o alumnado de 5º e 6º de Primaria gravaron esta mañá o audio para un vídeo que están facendo na materia de Inglés sobre Lady Di. 
Fixeron a actividade en catro quendas de oito alumnos.
Son uns grandes profesionais!

"A radio é o medio máis democrático de comunicación."
Martina Castro

martes, 22 de maio de 2018

Visita de María Canosa

Non atopamos mellor maneira de seguir homenaxeando as Letras Galegas que coa escritora de Cee, María Canosa.

Esta mañá, a autora de MURIEL chegou á Quinta dos Libros para resolverlle case todas as dúbidas ao alumnado de 6º de Primaria que recentemente leu o seu libro galardoado co premio Merlín 2017. E dicimos case porque, como ben explicou ela, gústanlle os finais abertos para que cada un dos lectores/as complete a historia.


Asinou no Libro de Honra e tamén en cada un dos nosos exemplares de Muriel.

E en agradecemento pola súa visita e por ser tan encantadora, agasallámola cunhas conservas da Rosaleira.

"O máis importante non é gañar premios, senón que lle guste o libro aos lectores".
María Canosa

luns, 21 de maio de 2018

Amigo invisible

Alumnos e alumnas de 4º de ESO xunto con profesores/as de Secundaria participaron no sorteo do amigo invisible para coñecer a persoa á que ten que agasallar cada un. Agora quédalles buscar ese libro que se axuste aos gustos literarios do seu receptor.

Por outra banda, na última sesión do obradoiro de sexualidade co alumnado de 2º de ESO, a educadora familiar do Concello de O Rosal falou das zonas eróxenas, das relacións interpersoais e mais da primeira relación sexual. 

Mentres que o alumnado de 3º fixo a práctica de como usar un preservativo e, a través dun xogo, aprenderon como se poden prever as enfermidades de transmisión sexual.

Rematados xa todos os obradoiros, na vindeira sesión de titoría, cada curso fará unha avaliación destas xornadas.

"É importante recordar que todos e todas temos maxia dentro de nós".
J.K. Rowling

mércores, 16 de maio de 2018

Día das Letras Galegas 2018

A autora que se homenaxea no Día das Letras Galegas 2018 é María Victoria Moreno. Escritora nacida circunstancialmente en Cáceres, pero que afirmaba ser galega xa que foi a terra onde viviu a maior parte do seu tempo. 
Sobre todo a terra e a lingua coa que se identificaba.


Exposición sobre María Victoria Moreno na entrada do centro
 A autora de Anagnórise decidiu defender e reivindicar a lingua galega, ata o punto de dar clases clandestinas da nosa lingua durante a ditadura.

Na entrada do centro estivo durante toda a semana unha exposición bibliográfica da escritora e, ademais, todo aquel que quixera podía deixar plasmado nas fiestras da biblioteca e corredores, manifestacións poéticas en lingua galega.

E Noemí, membro do club de lectura de adultos, déixanos a seguinte recomendación lectora:


" Por iso penso que a situación do galego non se pode ver con indiferenza. Se estou coa xente que amasa o meu pan e mais colle no mar os peixes da miña mesa, tamén quero falar con eles, falar a súa fala."
 María Victoria Moreno

martes, 15 de maio de 2018

CMAL

Esta mañá o Centro Médico de Asistencia Lectora (CMAL) abriu as súas portas por derradeira vez este curso para atender as doenzas literarias dos pacientes. Contamos cun cadro médico experto encargado de receitar os mellores remedios lectores aos nosos usuarios e usuarias.

Non hai mal que non curen os libros!
" Sexamos razoables e engadamos un oitavo día á semana adicado exclusivamente a ler."
Lena Dunham